ប៉េរូ៖ អតីតប្រធានសហព័ន្ធបាល់ទាត់ប៉េរូ លោក Manuel Burga Seoane ត្រូវបានរងបំរាមមិនឱ្យពាក់ព័ន្ធនឹងសកម្មភាពបាល់ទាត់អស់មួយជីវិតពីសំណាក់ FIFA បន្ទាប់ពីលោកត្រូវបានគេរកឃើញថាបានចូលរួមក្នុងការរៀបចំគម្រោងនៃការប្រព្រឹត្តអំពើពុករលួយ។ 

បន្ថែមពីលើការដាក់ពិន័យមិនឱ្យពាក់ព័ន្ធនឹងសកម្មភាពបាល់ទាត់អស់មួយជីវិតនេះ លោក Seoane ក៏ត្រូវបានបង្គាប់ឱ្យបង់ប្រាក់ពិន័យចំនួន ១លានស្វីសហ្វ្រង់ (ប្រមាណជា ១,១លានដុល្លារអាមេរិក) សម្រាប់ការរំលោភលើមាត្រានៅក្នុងក្រមសីលធម៌របស់ FIFA ទាក់ទងនឹងជម្លោះផលប្រយោជន៍ ការស៊ីសំណូក និងអំពើពុករលួយ និងការផ្តល់ជូន ឬទទួលយកអំណោយ និងអត្ថប្រយោជន៍ផ្សេងៗទៀត។

សេចក្តីសម្រេចនេះក៏ធ្លាប់់ត្រូវបានលុបចោលដោយតុលាការមជ្ឈត្តការកីឡា (CAS) កាលពីខែមេសា ឆ្នាំមុនផងដែរ មុនពេលដែលបានបញ្ជូនទៅអង្គជំនុំជម្រះស៊ើបអង្កេតនៃគណៈកម្មាធិការសីលធម៌ឯករាជ្យ។ អង្គជំនុំជម្រះបានបញ្ជាក់ថា ជាការពិតជាក់ស្តែងណាស់ដែលលោក Seoane ដែលជា​អតីត​សមាជិក​នៃគណៈកម្មាធិការ​ប្រតិបត្តិ CONMEBOL និង​គណៈកម្មាធិការ​អភិវឌ្ឍន៍ FIFA ពិតជាបានប្រព្រឹត្តអំពើ​បំពាន​ក្រមសីលធម៌។

ក្រៅពីការដាក់ពិន័យលើលោក Manuel Burga Seoane បន្ថែមពីនេះ FIFA បានសម្រេចដាក់ពិន័យទៅលើលោក Bimo Wirjasoekarta ប្រធានក្លិបបាល់ទាត់ឥណ្ឌូណេស៊ី Tira Persikabo រយៈពេលពីរឆ្នាំបន្ទាប់ពីរកឃើញថាគាត់មានទោសពីបទ "ការបង្ខិតបង្ខំ ការគំរាមកំហែង និងការកេងប្រវ័ញ្ចលើកីឡាករ"។ យ៉ាងណាមិញ ការដាក់ដាក់ទណ្ឌកម្មលើ លោក Wirjasoekarta ត្រូវបានព្យួរសាកល្បងរយៈពេល ៣ឆ្នាំ ហើយត្រូវបង់ប្រាក់ពិន័យឱ្យ FIFA ចំនួន ១០,០០០ ស្វីសហ្វ្រង់ផងដែរ៕